Matthew 11
Ioanesi Itema sou U'ulosi'a ta Mitema Mupalusi'a ta Molomolo Noxou Milai Noxou Iesu
(Luk 7:18-35)
1Ioxe ili'i no mine Iesu muvivikalane'i ta molomolo noxou mavulovexa mo mulelia tamei mukalu, la ane'i misuku milai no xalee lia tila ne Xalilaia. La mi'unalai no tuala tatatila sou Anu mulosie'i xe mua'aloxu vaikala noxou Lataua noxi'a ta mitema. 2Ioxe, no mine Ioanesi muxolu no taasou navunavu, la mulomusou a'alosou xaixai noxou Kalisito, la mupalusi'a ta molomolo noxou milai noxou. 3Ane'i milai la mitali'isou aloxo 'o, “Nini itema e lexe nane'e ano 'o? Uasi, nexi texomaiou itema vile 'a uao.” 4Iesu muavuti la mukoline'i lexe, “Ngalivu ngalai noxou Ioanesi la nga'aloxu mii ma'ia ane ngemaisou xe ngelomusou. 5 aNgalai nga'alo lexe, ta mitema ie'i seleveenu mimalei, mo ane'i ane tava'a musoisoli ne mimuamua'i, mo ane'i ane vulukali mu'oxonu vasime'a ne laixene'i, mo ane'i ane ilolomu uasi ne milomu mo ane'i ane misoisoli ne mimauli. Xe ane'i ane lavuluti'a uasi ne, milomusou a'alo laixe noxou Lataua. 6Mo 'ei ane umaisou xaixai ane eni e'oxonu xe xavutalau ukalipala uasi, ia xavutalau vilesisi noxilo, la anu u'osa.”7Ioxe no mine ta molomolo noxou Ioanesi milivu mukalu la Iesu muavuti sou mua'aloi'a ta mitema lamana noxou Ioanesi aloxo 'o, “Ngingi ngelai no xalee lia vitanisi sou ngemaisou mii ma'ia? Ngelai sou ngemaisou atume muilisou visoviso volovoloxu? 8Lexe uasi, la ngingi ngelai ne sou ngemaisou mii ma'ia manina? Itema vile mutokolomo no anu tokolomo lailaixe? Uasi, ane'i ane tokolomo no anu tokolomo lailaixe ne ixoxolu no tani noxi'a ta tatananu tualasi. 9Aloxo ne la sou ngingi ngelai sou ngemaisou mii ma'ia manina ne? Itema sou palomatana vile? Ani, ia eni avikalangengi lexe itema sou palomatana ane ne muuliuli noxi'a ta mitema sou palomatana tatei. 10 bItema ane nesi ane'i mikaukavusou muxolu no nano no anu Lavuku Tavuna teinu muvikala lexe,
‘Eni apalusou itema vile sou a'alo uuli noxine,
mo upaipounu vote'isine tei.’
11Eni avikalangengi manina aloxo 'o. No taine'i ta mitema e ta neni'a mivo'one'i no lia 'o ne, vile uxali tatila manina loxo Ioanesi itema sou u'ulosi'a ta mitema uasi. Ia lexe itema ane uxali kitu'a manina no nano no anu saxisaxila'u noxou Lataua la anu utila noxou Ioanesi. 12 cMusoko no voxo ane Ioanesi itema sou u'ulosi'a ta mitema mua'alo mune'e muxali vaimomo 'o ne, la ta mitema e xavine'i ne i'oto'oto xavine'i sou lexe ino'u tualasou saxisaxila'u noxou Lataua teitexi no opo loxotolo. La ane'i xavine'i sou i'oxonu 'ilixo iouiou mo i'oto'oto xe itetelisou mii ane ne. 13Ta mitema sou palomatana mo Lapuloto noxou Mosesi mia'aloxu vaikala noxou Lataua mune'e mutalo no voxo ane Ioanesi muxali no anu. 14 dIa lexe ngingi opongengi u'osa mo ngalomuxu la anu Eliasi e lexe une'e ane. 15Ia lexe 'ena'ei ane mulavusou lexe sangalou a uxoxolu sou ulomu no anu la laixe lexe ulomu sou vaikala ane 'o. 16Ia ta mitema mipaa vaimomo 'o, eni avikalasi'a a loxovaa? Ane'i loxo ta molomolo ixoxolu no tanixu pitapita, la mi'ava mulai noxi'a ta menexi'a lexe,
17‘Nexi tevau xita lexe ngalei la ngingi ngamasaxa ngalei uasi,
mo nexi telexe lexe sou soli la ngingi ngatama uasi.’
18La sou ngingi ne aloxo ta molomolo ne, xo Ioanesi itema sou u'ulosi'a ta mitema muxali la u'ani xe uie uasi, la ngingi ngevikala lexe uleenu masua muxolu noxou. 19 eIa Itema 'Olu muxali xe mu'ani xe muiexu uaini la ngingi ngevikala lexe, ‘Itema 'o ne uvunekaina mo uie u'okinu manina. Mo anu vaitami'a ta mitema sou itaxusou lamoli ilo'a ta mitema sou 'ili'ilixo masumasua.’ Ia ane'i ixaxai noxou Lataua sou imaxa'u lexe lavulavu noxou Lataua ne anu lavulavu maninasou.”
Tuala Ta Tatila E Imuxaxu Tane'i Uasi ne Ino'u Navunavu Kaluxu Uasi
(Luk 10:13-15)
20Ioxe, Iesu muavuti la mu'unalai no tuala ta tatila, la mu'oxonu sosovo tavu'alo ia ane'i ixiu opone'i uasi. 21 fLa sou Anu muavuti la mulavixa'a la muvikala lexe, “Eni talelixa'a ta Korasini ilo'a ta Vetesaida! Lexe sosovo ane eni e'oxonu noxinge 'o, a'oxonu ne ta Taia xe ne ta Saidoni, la ane'i ipalea sou itokolomoxu tokolomo sou tama xe i'uloxu no lomulo sou umaxa'u lexe ane'i mixiunu opone'i. 22Ia eni avikalangengi aloxo 'o, no voxo ane Lataua utulusi'a ta mitema no anu vaivaikala la tu'utu'umaxu uxali noxinge ne ua'ulixu tu'utu'umaxu noxi'a ta Taia ilo'a ta Saidoni. 23 gMo ngingi ta Kapenaumu loxovaa ngingi ngalai teitexi no loxotolo kalumo? Uasi, Lataua uleangengi ngalu'elai no lia no taxa kaluxu uasi. Ia lexe sosovo ane eni e'oxonu noxinge 'o, uxali noxi'a ta Sodomu la vaimomo 'o ta Sodomu a ixoxolu sio. 24 hIa eni avikalangengi aloxo 'o, tu'utu'umaxu noxi'a ta Sodomu ne kitu'a sesi ua'ulixu tu'utu'umaxu noxinge no anu voxo ane Lataua utulusi'a ta mitema no anu vaivaikala.”Ngingi Ngane'e Mo Ngama'ila
(Luk 10:21-22)
25 iIoxe Iesu muavuti la musolonu vaivaikala noxou la muvikala lexe, “Eni a'itinu Mamilo Lataua ualasou anu Tila teitexi no opo loxotolo mo no lia 'o kalumo. Xo Anu mutalumeu noxi'a ta mitema sou lavulavu xe itema mulavusou mimii latala ia mupala'alixu vaikala manina lamana noxi'a ane'i ane italoxolixa'a loxo ta molomolo. 26Ani, Mamilo nini masaxa noxine aloxo ne la sou nini ne'oxonu aloxo ne. 27 jMamilo anu mulosilo mimii tavu'alo mukalusi. Evile ulavusou Lataua 'Olu uasi, ia Momusi mulavusou mo evile ulavusou Momu uasi anu 'Olu anusisi mulavusou. La sou 'Olu mupala'alixu momu lamana noxi'a, ane'i ane Anu musosovosi'a lexe Anu ta na'u. 28 kLa sou ngingi ane tavuevulengenge tu'umaxu la ngane'e noxilo mo eni alosinge ma'ila. 29Ngatavulenu tavule noxilo loxo isakiinu no anu ta kau xolane'i mo sou eni alosiengi no anu lavulavusilo. Xo eni opo se'isisi mo 'ilixo sou ataloxolixo no taleli. La sou uleengengi uma'ila. 30 lXo tavule noxilo ne papaxexu mo tavuevule noxilo ne tu'umaxu uasi papaxexusi.”
Copyright information for
ATA